EU 
ES Nor naiz
GIZAKI BAT, zure antzera
ERRONKAZ beteriko bizitzarekin, zure antzera
Batzuetan, erresistentzia handiena duen bidea aukeratzen duena, bestetan, bidetik atera eta galduta sentitzen dena.
Baina banaiz ni neu berriz topatzeko asmo osoz ibiltzen den hori ere, naizen horri izateko baimena ematen diona, bestetan baimena ematen ez badiot ere.
Gure beharrez jabetzen garenean, geure egiarekin egiten dugulako topo. Eta honek laguntzen digu bizitzan ikasten jarraitzen eta gero eta lasaiago bizitzen.
Gehiago…
Ingeniaritza ikasi nuen, baina ez nago oso ziur zergatik. Curriculum on bat nuelako agian, edo inguruko jendeak hori espero zuelako akaso. Kontua da beti liluratu nautela giza-interakzio eta pertsonen arteko harremanek. Gaur, konturatzen naiz, zientziara gerturatzeko saiakera bat ere izan zela, hurrengo galdera hauen erantzuna topatuko nuelakoan. Zergatik existitzen gara? Zertarako nago hemen?
Urte dexente pasa nuen Donostiatik urrun, galdera hauen erantzunak topatuko nituelakoan. Bartzelonan pare bat urtez, gero Perun, Pirinio katalanetan 6 urtez, Ingalaterran… baina batzuetan erantzunak aurkitu nituela iruditzen bazitzaidan ere, gero eta urrunago zeudela ohartzen nintzen.
Eta oso kontziente izan gabe sekula izan dudan bidai zailena zein politena burutzen hasi nintzen. Oztopoz beterikoa. Barrurako bidaia miragarria hain zuzen. Barruan gertatzen ari zenari atentzioa jartzen eta nire irudien kontrola nire menpe hartzen poliki-poliki. Eta horrelaxe hasi nintzen Biosintesian oinarritzen den Psikoterapia somatikoko ia 4 urteko masterra ikasten. Hori amaituta beste ikastaro asko egiten jarraitzen dut, barne-ikaskuntzara eta garapen pertsonalarekin zerikusia dutenak.
Azken urteetan, etengabe ibili naiz nire bihotzerako bidea egiten, mingarria eta ederra parte igualetan. NIRE BIZITZA bizitzearen sari izugarriarekin. Eta hau gutxi balitz, lasaitasun handia ere ekartzen didana, ez baitut hasieratik nituen galderak erantzuteko beharrik sentitzen. Nire barnean baitaude erantzunak, ni neu bainaiz erantzuna.
Nire eginkizuna
Nire eginkizuna, sentitzen dudanarekin guztiz bat egotea da oraintxe bertan. Eguneroko lanaren bitartez nire prozesu pertsonal zein profesionala fintzeko eta hobetzeko asmoz.
Oso helburu garbi batekin: nire buruari eta besteei inspirazioz, pozez, aitorpenez, baimenez eta kontzientziaz betetzea. Eta baita espazioa eta laguntza eskaintzea bide honetan azaleratzen diren minei, tristurari, beldurrei, amorruari, inkontzientziari eta hutsegiteei.
