Nor Naiz

Askotan errepikatu didate, txikitan oso haur sensiblea nintzela eta kanpo-estimulu eta interakzioek asko baldintzatzen zutela nire jarrera. Horrexegatik ingurukoen begiradara egokitzen ikasi nuen konturatu gabe. Gogoko zituzten irudi desberdin asko sortu nituen, nire buruaz ahazten nintzen bitartean. Irudi hauek gaur naizeneraino bizirauten lagundu badidate ere, luzaroan, haien gatibu izan naiz, haiekin guztiz identifikatuta sentituz. Oraindik ere, noizbehinka bisitatzen jarraitzen baditut ere, konturatzen naiz zergatik eta zertarako egiten dudan. Horrela, errazago eta azkarrago egiten diot kasu nire benetako beharrari, barruan dudana sentitzen eta adierazten. Ni neu izateko bidean guztiz murgilduta bainago.

Ikaskuntza honek asko laguntzen dit niregana datozen pertsonen zailtasunak, beldurrak eta angustiak ikusi eta haien bide-lagun izateko. Norberak ikusi eta egin behar baitu bere bidea. Hauxe da nire bertute handiena eta nire inguruaren zerbitzura jartzen saiatzen naiz, arlo pertsonal zein profesionalean.